खुलताबाद : गंगापूर-खुलताबाद विधानसभा मतदारसंघाचे आमदार प्रशांत बंब यांच्याविषयी सोशल मीडियावर बेताल वक्तव्य करून आक्षेपार्ह भाषा वापरल्याप्रकरणी अमरावती येथील शिक्षक चंद्रशेखर भोयर यांच्यावर गुन्हा दाखल करावा, या मागणीसाठी भारतीय जनता पार्टी खुलताबाद तालुक्याच्या वतीने मंगळवारी (दि. ९) पोलीस व तहसील प्रशासनाला निवेदन देण्यात आले. यावेळी भाजपाच्या पदाधिकाऱ्यांनी सदर प्रकाराचा तीव्र शब्दांत निषेध नोंदवला.

नेमके प्रकरण काय?

दि. ५ डिसेंबर रोजी काही शिक्षक संघटनांनी टी.ई.टी. परीक्षेच्या विरोधात छत्रपती संभाजीनगर येथे मोर्चा काढला होता. या संदर्भात पत्रकारांनी आमदार प्रशांत बंब यांना प्रश्न विचारला असता, त्यांनी "जवळपास ७० टक्के शिक्षक लाडावलेले आहेत. त्यांनी जो संप केला आहे, त्यांची केवळ वेतन कपात न करता, निलंबनाचे आदेश काढले पाहिजेत," असे मत व्यक्त केले होते. आमदार बंब यांच्या या विधानाचा संदर्भ घेत अमरावती येथील शिक्षक संघटनांचे पदाधिकारी चंद्रशेखर म. भोयर (रा. अमरावती) यांनी सोशल मीडियावर एक व्हिडिओ प्रसारीत करून आमदार बंब यांना काळे फासण्याची भाषा केली होती.

भाजपची आक्रमक भूमिका

चंद्रशेखर भोयर यांच्या या बेताल वक्तव्याचा खुलताबाद तालुका भाजपाने समाचार घेतला आहे. मंगळवारी तहसीलदार आणि पोलीस निरीक्षकांना दिलेल्या निवेदनात भाजपाने म्हटले आहे की, "आमदार प्रशांत बंब हे मुख्यालयी न राहणाऱ्या आणि कामचुकारपणा करणाऱ्या शिक्षकांवर नेहमीच आवाज उठवतात. ते गरिबांच्या मुलांच्या शैक्षणिक भवितव्यासाठी आणि पिढ्या बरबाद होऊ नयेत म्हणून झटत आहेत. त्यांच्या पाठपुराव्यामुळे तालुक्यातील शिक्षक सुधरण्याचा प्रयत्न करत आहेत. अशा परिस्थितीत, आमदारांच्या विरोधात काळे फासण्याची भाषा करणाऱ्या चंद्रशेखर भोयर यांच्यावर तत्काळ गुन्हा दाखल करण्यात यावा आणि त्यांनी आमदार बंब यांची जाहीर माफी मागावी."

उपस्थित मान्यवर

यावेळी निवेदन देताना भाजपा तालुकाध्यक्ष प्रकाश चव्हाण, जिल्हा सरचिटणीस विकास कापसे, माजी तालुकाध्यक्ष ज्ञानेश्वर नलावडे, माजी जि.प. सदस्य एल.जी. गायकवाड, माजी सभापती गणेश आधने, माजी उपसभापती दिनेश अंभोरे, नवनाथ बारगळ, सुरेश मारकड, शहराध्यक्ष परसराम बारगळ, आशिष कुलकर्णी, प्रशांत गदाणकर, योगेश बारगळ, सतीश दांडेकर, सोमीनाथ तुरेवाले, अविनाश कुलकर्णी, सचिन चव्हाण, शिवाजी गायकवाड, संतोष राजपूत, राजेंद्र बढे, अरुण पाटे, संदीप निकम, बंडू शिंदे, बाळू नलावडे, विकीन हजारे, आनंद काटकर, वसंत शिरसाठ, द्वारकादास जाधव, गोविंद काळे, शंकर अंभोरे, संदीप आधाने, हरिदास म्हसकर, गुलाब कुचे, संभाजी श्रीखंडे, प्रेम राठोड, शुभम भागडे, नंदकुमार चव्हाण, गोरक्षनाथ बारगळ यांच्यासह मोठ्या संख्येने भाजप कार्यकर्ते उपस्थित होते.

न्यूज़ पेपर, टीवी व डिजिटल मीडिया वर बातमी व जाहिरात देण्यासाठी संपर्क करा. 9834985191. आपले हक्क आणि समस्यांच्या निराकरणासाठी आपल्या पंचक्रोशीतील मीडिया शी संपर्क करा, स्थानिक पातळीवर काम करणाऱ्या पत्रकारांना प्रोत्साहन द्या. तरच भ्रष्टाचार संपेल आणि भरभराटीचे दिवस येतील.

 ब्रेकिंग न्यूज, सरकारी व खासगी जॉब अपडेट, सरकारी योजना व इतर महत्त्वपूर्ण माहिती तुमच्या मित्र परिवारातील लोकांना मिळण्यासाठी आमचा 9834985191 हा नंबर तुमच्या गावातील व् इतर् WhatsApp गृपमध्ये ॲड करा.